Daoust d'an niver bras a-walc'h a gampoù kinniget e Breizh a-bezh a-hed ar bloaz, e chom kamp KEAV gwall zisheñvel diouzh ar c'hampoù all evit meur a abeg.
Da gentañ ar reolenn « brezhoneg hepken » hag a zo lezenn ar c’hamp. Abaoe an deroù, abaoe kentañ kamp KEAV ez eo ar brezhoneg yezh nemeti ar staj, n’eo ket e-pad ar c’hentelioù hepken, met an devezh-pad (hag an nozvezh-pad zoken !), e pep degouezh zo : e-pad ar predoù, ar pourmenadennoù, ar c’han, an dañs, gweladennoù, c’hoarioù, ar beilhadegoù hag oaled-ar c’hamp…
D’an eil, e-maez ar c’hentelioù, e vez kinniget obererezhioù a bep seurt a-hed an devezh pe dost d’ar stajidi : n’eus ket kalz a amzer vak d’ar re a zo kontant kemer en holl anezhe. Hag int a zo kement a zigarez d’ober gant ar brezhoneg. E-touez an obererezhioù-se, menegomp : kaozeadenn etre ar stajidi, pourmenadennoù, atalieroù, kan, prezegennoù war danvez pe danvez, mont da welet tud deus ar vro.
